1992 वर्सा बार्सेलोना शारांत घडून आयिल्ल्या ऑलिम्पीक्सांत 400 मिटर धांवपाच्या प्रकारांत डेरेक रेडमंडस हो ब्रिटीश खेळगडो वांटेकार जाल्लो. त्या ऑलिम्पीक्सांतलें 400 मिटर धांवपा प्रकारांतलें भांगरा पदक ताकाच मेळटलें अशें सवंसारांतल्या साबार जाणांचें अनुमान आशिल्लें. ताचें कारण म्हणल्यार ताचे आदीं सवंसारीक पांवड्यार घडून आयिल्ल्या भोवतेक सर्तीनी ह्या प्रकारांत ताकाच पयली सुवात फावो जाल्ली.
ज्या दिसा ही सर्त प्रत्यक्षांत सुरू जाली तेन्ना एक घडणूक घडली. कांय अंतर धांवले उपरांत डेरेक रेडमंडसाच्या जांगडाची मासपेशी तुटली आनी तो वेदनेन कळवळपाक लागलो. कांय खिणांतच वैजकी आदार दिवपी आपवावुरपी स्ट्रेचर घेवन मुखार आयले. डेरेक रेडमंडसाकडेन विचार करपाक कांय खिणाचोच वेळ आशिल्लो. कारण इतले मजगतीं वांगडच्या सगल्या धांवपी सर्तकांनी निमणी रेशा हुपिल्ली. डेरेक रेडमंडसान त्याय स्थितींत त्या आपवावुरप्यांक परते धाडले आनी तो तसोच कळवळत धावंक लागलो. इतल्यांत स्टेडियमांतल्यान एक जाणटोसो मनीस थंय आशिल्ल्या सुरक्षा दळाच्या विरोधाची पर्वा करिनासतना मुखार सरलो आनी ताणे डेरेक रेडमंडसाक त्या स्थितींत धावतले कडेन आपलो आदार दिलो. त्या मनश्याच्या आदारान डेरेक रेडमंडसान निमणी रेशा हुपली तेन्ना स्टेडियमार उपस्थीत आशिल्ल्या पासस्ट हजार लोकांनी ताका उबे रावन मानवंदना दिली.
डेरेक रेडमंडस तर ह्या सर्तींत निमण्या सुवातेर आयिल्लो. ताका कसलेंच पदक फावो जावंक नाशिल्लें. मागीर लोकांनी ताका उबे रावन मानवंदना दिवपाची कितें गरज आशिल्ली? आयज सत्तावीस वर्सां उलगलीं तरी डेरेक रेडमंडस लोकांच्या काळजांत कित्याक आसा? कित्याक लागून डेरेक रेडमंडसाची ही काणी सवंसारांतल्या कोटयानी लोकांक प्रेरणा दीत आयल्या?
कारण, सर्तींत पयली सुवात म्हत्वाची न्हय तर मुखार दवरिल्ली मोख म्हत्वाची हें त्या दिसा डेरेक रेडमंडसान दाखोवन दिलें. आपले खातीर पदक मेळचे परस परिस्थिती प्रतिकूल आसतनाय निमणी रेशा हुपप म्हत्वाचें ही देख ताणे त्या दिसा घालून दिली. आपली सर्त हेरां कडेन न्हय तर स्वताच कडेन आसता हो आदर्श ताणे सवंसाराक दिलो.
त्या दुख दिण्या खिणाक ताका स्टेडियमांतल्यान ट्रेकार येवन आदार दिवपी ‘तो’ कोण आशिल्लो जाणात? तो आशिल्लो ताचो बापूय. आयज अशे डेरेक रेडमंडस आनी आपल्या भुरग्याक प्रतिकूल परिस्थितींत मोलादीक नैतीक आदार आनी बळगें दिवपी पालक सपासप मेळनात!
पालक म्हूण सकाळ सांजवेळ आमी भुरग्याची सांवळी जावन ताचे फुडल्यान- फाटल्यान रावया. पूण भर दनपारच्या वताकडार जेन्ना तो रखरखत्या सुर्या खाला आसतलो तेन्ना ताका घडये आमची सावळी दिसची ना पूण आमचें अस्तित्व जाणवतलें आनी तीच ताची स्फुर्त थारतली हाची जतनाय घेवया.
आयच्या काळांत सर्त म्हत्वाचीच, पूण ती आपलेच कडेन हो आदर्श घालून दिवपी डेरेक रेडमंडस आमी घडोवया…. आनी तेखातीर डेरेक रेडमंडसाच्या बापायचो आदर्श आमचे नदरे मुखार दवरया.
